🔴 O GOBERNO DE VILAGARCÍA ACUSADO DE “RURALOFOBIA” POLA DERIVACIÓN MASIVA DE TRÁFICO AO RURAL E FALTA DE PLANIFICACIÓN VIARIA

EU considera unha aberración pretender que o mellorado vial que une Guillán e Bamio se converta nunha alternativa á avenida Rosalía de Castro. O voceiro do grupo municipal de EU acusa ao goberno Socialista de ruralofobia, ao pretender trasladar o tráfico da “humanizada” zona centro ao rural do concello. 

Durante a presentación das obras de mellora do vial, Alberto Varela expresou o que para EU é unha auténtica barbaridade: que o goberno local pretenda converter este vial nunha circunvalación alternativa ante o colapso da avenida Rosalía de Castro. 

Este tipo de actuacións están a provocar un exceso de tráfico rodado por vias que non teñen nin beirarrúas nin camiños peonís alternativos, o que fai que vivir no rural sexa un perigo en termos de seguridade viaria. 

EU pide a Varela igualdade de trato e que cada suposta mellora no entramado viario do rural vaia acompañada de elementos de seguridade para os peóns, como beirarrúas ou camiños peonís alternativos. Esta situación é froito da falla de planificación, onde os vehículos ocupan espazos que non reúnen as mínimas condicións, convertendo as tranquilas rúas do rural en circunvalacións alternativas por culpa da improvisación do Goberno local.