🔴 SILOÉ ABRE AS FESTAS DE SANTA RITA CON CONCERTO GRATUÍTO NO SÁBADO 18 NA XUNQUEIRA

A banda vallisoletana Siloé protagonizará o gran concerto co que se abrirá o programa festivo de Santa Rita, que este ano gaña un día respecto do que vén sendo habitual, é dicir, do sábado 18 ao mércores 22 de maio. O conxunto de actividades no que traballa a concellería de Cultura, que dirixe Sonia Outón, será presentado nas vindeiras xornadas. Polo de pronto, xa se sabe quen tomará o relevo de Revólver, o grupo do ano pasado.

O concerto de Siloé comezará ás 23:00 no parque da Xunqueira e a entrada será libre e gratuíta, como vén sendo habitual nas festas vilagarciás. A trío está liderado polo vocalista e cantautor Fito Robles, ao que acompañan o guitarrista e produtor Xavi Road e o batería Jaco Betanzos. Dende a súa creación, a banda de Valladolid foi evolucionando e mesturando a canción de autor folk e o pop/rock coa electrónica máis bailable. A dualidade dos seus mundos converxe de maneira perfecta, e iso trasládase aos directos, nos que, dependendo do recinto, pasan de momentos de absoluta enerxía bailable a outros máis introspectivos e acústicos. Temas como “La verdad” acumulan ata doce millóns de escoitas só na plataforma Spotify.

Tras “La verdad” (2016), “La luz” (2018), “Metrópoli” (2020) e “Paradiso” (2021). Nalgúns dos seus traballos contaron coa colaboración de artistas convidados da talla de Miss Caffeina, Belén Aguilera, Varry Brava, Dani Fernández e Delaporte, entre outros. Agora, os tres compoñentes de Siloé están inmersos na súa xira máis ambiciosa. Unha nova etapa na que están a presentar o que xa é, segundo recoñecen, o disco das súas vidas: “Santa Trinidad”. Un álbum, afirman, cargado de himnos instantáneos destinados a ser coreados en grandes recintos como “Todos los besos”, “Sangre en las venas” ou “Esa estrella”. Composicións que deixan ben claro o status de Siloé como un dos grupos máis importantes do panorama do pop e o rock independente nacional. E así se presentarán o sábado 18 de maio, na Xunqueira.