🔴 A MEDIA MARATÓN 'ENTRE RÍAS' ROZA XA OS 1.000 INSCRITOS A UNHA SEMANA DO EVENTO QUE UNIRÁ SANXENXO E O GROVE

Telmo Martín e José Cacabelos, alcaldes de Sanxenxo e O Grove respectivamente, xunto con Serafín Martínez da empresa organizadora Nokao, e o concelleiro de Deportes, Marcos Guisasola, presentaron esta mañá a media maratón Entre Rías na capela de A Lanzada, lugar de inicio da carreira dos 10K.

A media maratón sairá do porto de O Grove ás 10:30 horas, percorrendo a Illa da Toxa e a praia de A Lanzada, para rematar no porto deportivo de Sanxenxo. Os participantes poden correr individualmente ou en relevos en parella. Ademais, o mesmo día haberá unha carreira alternativa de 10K con saída desde a Ermita de A Lanzada ás 11:30 horas, con meta no porto deportivo de Sanxenxo.

A falta de dous días para o peche das inscricións, o mércores 15 de maio, a carreira xa conta con case 1.000 inscritos. "A aceptación para ser o primeiro ano foi espectacular. As expectativas que tiñamos eran moi altas e están a cumprirse", dixo Serafín Martínez. "Queremos que a xente que veña este ano repita. O percorrido é único e de gran beleza", asegurou. Na cita repartiranse máis de 3.000 euros entre os gañadores das distintas categorías.

O alcalde de Sanxenxo destacou a colaboración entre dous concellos turisticamente relevantes como O Grove e Sanxenxo neste proxecto que está destinado a consolidarse no tempo. A cita será un motivo máis para visitar a zona e disfrutar dun fin de semana.

Pola súa parte, o alcalde de O Grove resaltou que "trátase dun evento deportivo que se vincula ao atractivo turístico da zona e a este espazo xeográfico. Será un fin de semana importante para O Grove e Sanxenxo". "Recibiremos este domingo a todos os deportistas xunto á estatua do pescador, dende onde partirá a proba da media maratón na Praza do Corgo", sinalou. Finalmente, animou a todas as persoas amantes do deporte a "participar na proba e disfrutar da beleza do entorno".

Nesta primeira edición especial de Entre Rías, o sábado 18 de maio, o paseo marítimo de O Grove acollerá probas para nenos e nenas de ata 13 anos a partir das 17 horas, con inscrición gratuíta. As inscricións pódense realizar na web oficial do evento ata o próximo mércores, www.entreriasmediamaraton.com.