O
delegado territorial da Xunta en Pontevedra, Agustín Reguera, visitou esta mañá o Hotel del Mar, no concello de Sanxenxo, que recibiu unha achega de 150.000 euros como parte das subvencións para actuacións de eficiencia enerxética en empresas turísticas de Turismo de Galicia. A empresa utilizou a axuda para mellorar o illamento das fachadas e da cuberta e instalar unha iluminación LED de baixo consumo que lles permitirá disminuír significativamente o gasto enerxético.
Acompañado polo alcalde de Sanxenxo, Telmo Martín, o delegado territorial sinalou a importancia deste tipo de axudas que permiten a moitas empresas “aforrar no seu gasto enerxético, á vez que diminúen a súa pegada de carbono”. Trátase, segundo explicou Reguera, de axudas que, máis alá de apoiar aos empresarios galegos, permiten mellorar a imaxe e a calidade dos servizos turísticos desta comunidade.
No concello de Sanxenxo, un total de cinco empresas se beneficiaron desta liña de axudas, que suman máis de 670.000 euros. Na área territorial de Pontevedra, as empresas beneficiadas son 15 e recibiron un investimento da Xunta de máis de 1,2 millóns de euros.
Ademais, Reguera anunciou a volta da campaña do Bono Turismo que arranca a finais deste mes de xuño, tanto para as empresas que queiran adherirse como para os usuarios que queiran descargalo e beneficiarse das súas vantaxes. A partir deste mes de xuño, calquera galego poderá descargar un máximo de dous bonos de 150 euros cada un, que poderá utilizar dende o 10 de setembro ao 25 de decembro. A Xunta porá a disposición dos usuarios máis de 16.000 bonos, cun investimento total de un millón de euros, co que espera mobilizar ata dous millóns de euros. Este ano haberá unha novidade, xa que o usuario terá que adiantar unha parte do bono, 90 euros, mentres que os 60 euros restantes serán asumidos pola Xunta. Reguera rematou a visita destacando o éxito que ten demostrado esta campaña á hora de “desestacionalizar e descentralizar o turismo en Galicia”, mobilizando ata 14 millóns de euros dende a súa posta en marcha despois da pandemia do Covid.
