🔴 AS NOVAS LIÑAS DE AUTOBÚS DE SANXENXO IMPULSADAS POLO CONCELLO PARA O VERÁN CO APOIO DA XUNTA COMEZAN A FUNCIONAR ESTA FIN DE SEMANA

A directora xeral de Mobilidade, Judit Fontela, participou hoxe no percorrido de proba da liña lanzadeira que se porá en marcha esta fin de semana en Sanxenxo no marco do acordo asinado entre a Xunta, o Concello e a UTE do transporte XG-626. Este é un dos novos servizos municipais previstos para este verán, que inclúen tamén dúas liñas circulares con saída e chegada na igrexa de Sanxenxo. O funcionamento destas liñas prolongarase ata o 8 de setembro.

Segundo sinalou a directora xeral, a iniciativa enmárcase no obxectivo de reducir o uso do vehículo privado e fomentar o transporte público para unha mobilidade sustentable en Galicia. As persoas usuarias das novas liñas municipais de autobús poderán beneficiarse dos descontos e vantaxes da Tarxeta de Mobilidade de Galicia (TMG), con bonificacións que chegan ao 50%. Ademais, os menores de 21 anos poden realizar ata 60 viaxes ao mes de maneira gratuíta coa Tarxeta Xente Nova, ao igual que todas as persoas maiores de 65 anos con tarxeta TMG.

A liña lanzadeira, probada hoxe, contará con paradas no polígono de Nantes, no Hotel Terraza e en Baltar-Rotonda de Hipercor, cunha duración estimada da viaxe de pouco máis de 15 minutos. Haberá 32 expedicións diarias cada media hora, entre as 8:00 e as 23:30 horas.

As dúas liñas circulares, con percorridos en ambos sentidos, terán como punto de inicio e fin a igrexa de Sanxenxo, percorrendo o concello con 29 paradas cada unha, nun tempo estimado de 50 minutos. Haberá 16 expedicións diarias en cada sentido (32 en total), con saídas cada hora desde as 8:00 ata as 23:00 no caso das idas, e desde as 8:30 ata as 00:30 no caso das voltas.

Esta iniciativa busca dar resposta ás necesidades de mobilidade colectiva detectadas en Sanxenxo, conectando diversos puntos do concello e servindo de conexión cos servizos de transporte regular de viaxeiros de uso xeral, ademais de reducir a conxestión viaria.