🔴 O CONCELLO DE CATOIRA GARANTIRÁ O SERVIZO DE ATENCIÓN AO FOGAR CON UN INVESTIMENTO MUNICIPAL DE 350.000 EUROS

O alcalde Xoán Castaño anuncia que os Orzamentos de 2024 inclúen un incremento de 120.000€ para este “servizo esencial” con respecto ás contas de 2021, as últimas aprobadas

O Concello de Catoira vai garantir o Servizo de Atención ao Fogar (SAF) neste ano 2024 cunha inxección de fondos municipais de 350.000 euros para a atención domiciliaria a maiores. Así o confirma o alcalde Xoán Castaño, quen subliña que o goberno local decidiu ampliar a partida destinada a este servizo básico en 120.000 euros dende o último orzamento aprobado, pasando dos 230.000 euros de 2021 aos 350.000 deste exercicio. “O SAF é unha prestación esencial para a cidadanía e queremos que se manteña porque supón calidade de vida, por iso o Concello vai asumir a responsabilidade da súa continuidade”, indica o nacionalista.

O rexedor explica que o incremento de fondos para o SAF confirmarase o vindeiro luns 17 coa aprobación xeral dos Orzamentos municipais para 2024. A subida económica débese principalmente á necesidade de facer fronte ao aumento de custos do servizo, toda vez que Xunta de Galicia -responsable desta competencia-, apenas achega unha parte “totalmente insuficiente” para financiar a contratación do persoal.

Castaño subliña que un dos eixos de goberno do grupo do BNG en Catoira está a ser, dende a chegada á Alcaldía, o reforzo e mellora dos servizos sociais para a cidadanía, principalmente para os sectores da poboación máis vulnerables como son as persoas maiores e dependentes que necesitan recibir atención nos seus domicilios. “Queremos priorizar e poñer no centro ás persoas e dar prioridade aos coidados, en particular das persoas maiores, que teñen todo o dereito a unha vellez digna estando na súa casa e ben coidadas”, indica, ao tempo que fai fincapé en que dende o Concello “por convicción” faranse “todos os esforzos económicos que sexan precisos se a Xunta non os fai”.

A prestación do Servizo de Atención ao Fogar foi en diferentes ocasións motivo de disputa coa oposición en Catoira, mais o alcalde quixo facer un chamamento público a que todos os grupos da Corporación apoien os novos orzamentos coas “importantes melloras” que suporán para as veciñas e veciños do concello.