🔴 O CONCELLO DE VILAGARCÍA PIDE COLABORACIÓN CIDADÁ PARA IDENTIFICAR AOS AUTORES DA QUEIMA DE CONTEDORES

🔴 O goberno municipal insta á veciñanza a colaborar coas forzas de seguridade para identificar aos responsables da queima de contedores, que nos últimos tempos rexistrou varios sucesos. Dende que se produciu o cambio de empresa foron nove as illas afectadas e inutilizados vinte contedores. O valor do destruído suma preto de 40.000 euros que son de todos os contribuíntes, non do concello nin da empresa especificamente. De aí a necesidade de que a cidadanía colabore na defensa dos bens públicos.

A policía vén investigando dende hai tempo a orixe destes feitos. No último suceso, na tarde de onte, arderon un sofá e varios contedores na rúa Adolfo Pedrido, fronte á piscina municipal. A rápida acción dos bombeiros, arredor das seis e media da tarde, impediu que houbera máis danos. Pouco despois, ás sete menos dez, na rúa San Cibrán, a apenas un quilómetro da anterior, tamén foi denunciado outro incendio. Tanto nun como noutro caso, os axentes puideron comprobar que a descrición do presunto autor dos feitos dada polos veciños era coincidente: un varón de arredor de 40 anos, con pelo canoso, camiseta negra e pantalón vaqueiro.

Nos casos antecedentes tamén hai algúns indicios sobre o autor ou autores dos danos, pero polo de agora non puideron ser identificados. A Policía Nacional é a que leva a investigación.