🔴 O GOBERNO LOCAL DENUNCIA SEIS MESES DE RETRASO NA LICITACIÓN DO NOVO CENTRO DE SAÚDE

🔴 O goberno local de Vilagarcía quere denunciar de novo o retraso na licitación das obras do centro de saúde a construír sobre os terreos da vella comandancia militar. Cun proxecto listo dende hai un ano, non foi ata a última campaña electoral en Galicia cando se anunciou que o proxecto sairía a licitación. En febreiro, asegurouse que sería en xuño, e en marzo, abril e maio reiterouse o compromiso. Porén, en xuño, en declaracións do presidente da Xunta (10.06.2024), afirmouse que “este mesmo mes” quedaría resolto. A día de hoxe, 10 de xullo, todo segue igual.

O executivo que dirixe Alberto Varela lembra que o Concello adquiriu os terreos da vella comandancia de Mariña, custeou a demolición do edificio (investindo máis de 1,3 millóns de euros), puxo o solar a disposición da Consellería de Sanidade e bonificou ao 95% as obras. Ademais, o proxecto está financiado con fondos europeos. “As preguntas que este goberno se fai e que estamos seguros que comparten milleiros de vilagarciáns son: que máis queren e a que esperan?”, resume a portavoz municipal, Tania García.

O goberno local advirte que non deixará de lembrar á Xunta e aos seus dirixentes que os compromisos con Vilagarcía están para cumprirse, non para xogar con eles en función de cálculos electorais ou partidistas. O executivo vilagarcián quere o novo centro de saúde canto antes e, por iso, reclama ao goberno autonómico que cumpra e licite xa. Neste sentido, insta ao PP local, tan celoso cos prazos cando se trata de obras municipais, a que explique á cidadanía a súa posición sobre este reiterado retraso na licitación.