🔴 O PP DA ILLA DE AROUSA LAMENTA A SUCIEDADE E PRESENZA DE ORÍNS NAS RÚAS TRAS A FESTA DO CARME POLA FALLA DE PREVISIÓN DO BIPARTITO

🔴  O grupo municipal do PP da Illa de Arousa expresou unha valoración moi negativa da xestión do bipartito durante as tradicionais Festas da Virxe do Carme. A vila amenceu o domingo chea de suciedade e oríns nas rúas do centro e outras zonas onde se desenvolveron as celebracións, debido á falla de previsión e eficiencia á hora de xestionar uns baños móbiles para os milleiros de asistentes.

O voceiro municipal do PP, Matías Cañón, cualificou de “lamentable” a imaxe que ofreceu a localidade nunha xornada de domingo en pleno verán, atribuíndo a situación á “incapacidade do goberno, por segundo ano consecutivo, para conseguir uns aseos públicos” para esta emblemática celebración.

“A verdade é que podemos chegar a entender a situación porque para un goberno do nivel que temos na Illa é bastante difícil contratar uns baños móbiles”, ironizou o concelleiro popular, engadindo que esta circunstancia “demostra que non hai ninguén ao fronte do Concello. Se non son quen de conseguir uns aseos, como van ser capaces de acadar os investimentos e prestar os servizos públicos que merecen e necesitan os nosos veciños?”

Cañón destacou que esta situación é reiterada, lembrando que o ano pasado tamén houbo problemas coa contratación dos baños móbiles: “Unha vez pode pasar algunha incidencia deste tipo, pero se che pasa unha vez, o que tes que facer ao ano seguinte é asegurarte de que vas poder prestar este servizo e non amosar unha absoluta desidia e vagancia”.

O voceiro popular, que comparte e entende as masivas queixas dos veciños pola forte presenza de oríns en contedores, rúas, vehículos, vivendas e negocios, negou validez á excusa do goberno local de que as festas non foron organizadas polo Concello. “Xa que ben que se fachendan da súa colaboración, que ademais é o mínimo que pode facer ante o esforzo dos organizadores dunhas festas tan importantes coma o Carme, pero estamos nunha situación de desgoberno tan grande que non foron capaces nin de colaborar co mínimo”.

Finalmente, instou ao executivo municipal a poñerlle solución para o ano que vén tras o anuncio de que pretende instalar uns baños no Regueiro. “A ver se á terceira vai a vencida. Sabemos que para eles é complexo conseguir uns aseos, pero teñen todo un ano por diante para tratar de facelo”, concluíu.