🔴 O PP DE CATOIRA ACUSA AO ALCALDE DE IRREGULARIDADES E FRAUDE NA CONTRATACIÓN DE PERSOAL

O grupo municipal do PP de Catoira acusa ao alcalde, Xoán Castaño, de graves irregularidades na contratación do persoal temporal para tarefas de peón, financiadas polo Plan +Provincia da Deputación de Pontevedra. Segundo o PP, estas prácticas fraudulentas están a prexudicar á veciñanza, atrasando traballos esenciais de obras e conservación.

Os populares denuncian unha valoración fraudulenta na selección dos candidatos, o que levou á presentación de numerosas alegacións e recursos. “Non quedou máis remedio que anular as contratacións e reiniciar todo o procedemento para evitar un escándalo aínda maior”, afirmaron.

Segundo o PP de Catoira, estas contratacións “non foron por méritos, senón a dedo”, e acusan ao alcalde de ser un “caradura político” por tentar desviar a responsabilidade ao tribunal de selección. “No noso concello todos nos coñecemos”, recalcaron.

“Que o alcalde saia dicindo que é necesario reiniciar o procedemento para garantir a transparencia e a igualdade de oportunidades, cando todo se debeu a un erro do seu equipo, é unha broma de mal gusto”, criticaron os concelleiros populares.

Para o PP, reiniciar o procedemento de selección era a “única alternativa viable” para tratar de remediar unha situación que deixa en evidencia ao alcalde e ao goberno local. Lamentan que se teña chegado a este punto, provocando un retraso significativo na execución dos traballos e servizos necesarios.

O PP local esixe aos nacionalistas maior dilixencia e rectitude na contratación de persoal, tanto fixo como temporal, e anuncia que intensificará o seu labor de control para garantir que todos os procedementos sexan limpos e xustos.