🔴 O PP DE CATOIRA CRITICA AS FORTES RESTRICIÓNS DE APARCAMENTO E TRÁFICO POLA ROMARÍA VIQUINGA

O grupo municipal do PP de Catoira vén de criticar as fortes restricións de aparcamento e de tráfico no centro da vila por mor das actividades vencelladas á Romaría Viquinga, xa que estima que causará graves molestias aos veciños e aos establecementos comerciais e de hostalaría, e lamenta que o Concello non artellara un plan alternativo máis acaído aos intereses dos catoirenses que permitira igualmente a celebración destes eventos.

Os populares consideran excesivo que a Praza Doutor Vázquez quede sen aparcamento durante tres días, con 62 horas clausurada, pola celebración neste emprazamento do VikingFilm, que ademais pechará durante doce horas a circulación polas súas dúas rúas de acceso.

Paralelamente, e con motivo do Mercado Medieval, a rúa da Estación e as Avenidas da Ponte e Eloy Domínguez terán o estacionamento restrinxido en ata 6 xornadas - desde mañá 30 de xullo ata o luns 5 de agosto - e o tránsito estará prohibido durante catro días completos con importantes restricións de acceso aos garaxes e para as labores de carga e descarga “que van dificultar enormemente que moitos veciños poidan deixar os coches nas súas propias prazas”.

A voceira municipal, Estefanía Frieiro, cre que este plan de tráfico “foi feito totalmente de costas á veciñanza de Catoira cunha absoluta desconsideración para o seu xeito de vivir, porque está claro que a Romaría Viquinga é moi importante e un orgullo para o noso concello, pero hai que traballar con dilixencia para causarlles as menores molestias posibles e non ir pola vía fácil de pechar todo o centro do pobo a cal e canto durante demasiados días”.

A concelleira popular sinala que esta medida vai causar “importantes molestias non só aos residentes, senón tamén a todo o comercio, a hostalaría e os servizos do centro urbano, que van sufrir importantes prexuízos por estas restricións, xa que as alternativas de tráfico e de estacionamento están moi alonxadas e non dan unha resposta eficiente ás súas necesidades”.

Por elo, Estefanía Frieiro reclámalle ao goberno nacionalista que matice estes importantes peches de prazas e rúas do centro urbano e deseño un plan, que aínda está a tempo, para que os veciños poidan empregar estes espazos durante máis tempo minguando os cortes e garantindo a celebración axeitada destas actividades da Romaría Viquinga.