🔴 O PP DE VILAGARCIA DENUNCIA A TALA DE CINCO ÁRBORES NO PASEO DE CARRIL

🔴  O Partido Popular de Vilagarcía rexistrou un escrito no concello reclamando ao goberno local información sobre a tala de cinco árbores no paseo de Carril. Os arbustos talados atopábanse no parque da rúa Lucena, en fronte do hotel Alda Carril.

No rexistro presentado, os populares cuestionan ao goberno local sobre o motivo da tala e se existe algún informe técnico que xustifique esta decisión. Para o Partido Popular, “chama a atención que de súpeto se corten cinco árbores sen constancia de que estivesen enfermos”. Engaden que “esperamos unha boa explicación, xa que non eran árbores que molestasen aos viandantes nin parecían estar en mal estado”.

Os populares tamén critican o cambio de actitude do goberno de Varela, afirmando que agora “para o Partido Socialista todo vale. Antes facían críticas ferozes cada vez que se cortaba unha árbore, e agora córtanse cinco do tirón e non pasa nada”. Tamén denuncian a imaxe que o goberno local deixa no parque, con troncos á vista cubertos con cintas. Por esta cuestión tamén preguntou o PP no rexistro presentado, desexando saber ata cando o goberno local deixará os troncos nese estado.

Para a formación, resulta rechamante que non cesen de recibir queixas polo descuido do rural debido ao aumento da maleza, e que agora se actúe con celeridade para cortar estes cinco árbores. “Nas parroquias non cortan a maleza, e cando o fan, deixan os restos amontoados, causando molestias aos veciños”, denuncia a portavoz local.

A tala destes cinco árbores reforza a denuncia constante do Partido Popular e dos veciños de Vilagarcía ao goberno local. “Faltan máis árbores na nosa cidade, estamos cansos de que o Partido Socialista de Alberto Varela elimine árbores para cubrir as zonas con formigón ou deixar os parques desertos”.

Os populares tamén dubidan sobre que fará o goberno local nese parque, xa que non hai constancia de ningún proxecto para a zona. Para a formación de Granja, esta actuación demostra a mala planificación e o pouco tacto que ten o goberno local para coidar a imaxe de Vilagarcía. “Temos un concelleiro de turismo que pouco ou nada fai por mellorar a imaxe e a promoción de Vilagarcía”, conclúen.