🔴 VILAGARCÍA ENVÍA 25 DEPORTISTAS AOS XOGOS DO EIXO ATLÁNTICO

Once pertencen ao deporte adaptado de Con Eles e o Centro de Educación Especial e o resto, á Agrupación Mazí

No evento compiten 2.400 rapaces de Galicia e o Norte de Portugal

🔴 Vinte e cinco deportistas de Vilagarcía forman parte dos 2.400 de varios concellos de Galicia e o Norte de Portugal que estes días participan na décimo quinta edición dos Xogos do Eixo Atlántico. A localidade lusa de Vilanova de Famalicâo é este ano o concello anfitrión. Once dos deportistas locais compiten nos xogos adaptados, representando aos centros Con Eles e de Educación Especial. O resto son da Agrupación Mazí de atletismo.

O concelleiro de Deportes e presidente da Fundación, Carlos Coira, acompañou á delegación vilagarciá, que hoxe entra en competición. En deporte adaptado tomarán parte das probas de 100 e 1.000 metros, salto de lonxitude e lanzamento de pesas. Os membros de Mazí, nas mesmas categorías, ademais de 4x100 relevos e atletismo en ruta.

Trala súa participación nos Xogos, os deportistas serán recibidos o vindeiro mércores polo alcalde, Alberto Varela, e outros membros do goberno. Os xogos foron inaugurados polo secretario de Estado de Deportes de Portugal, Pedro Dias, o presidente do Eixo Atlántico, Luis Noble, o vicepresidente, Alfredo García, os alcaldes de V.N. de Famalicão e de Braga, Mario Passos e Ricardo Rio, xunto con representantes de todas as cidades participantes, entre eles o vilagarcián Carlos Coira.