O Grupo municipal de Esquerda Unida (EU) denunciou ante o goberno local a ocupación ilegal da servidume do río do Con na avenida Rodrigo de Mendoza, onde unha promotora privada está a realizar un peche sobre a área protexida. EU solicita ao goberno local que actúe de inmediato para retirar o peche, que incumpre a normativa estatal.
O voceiro do Grupo municipal de EU criticou a “deixadez” da responsable de urbanismo, acusándoa de permitir esta vulneración normativa que cualificou de “atentado medioambiental inaceptable”.
As obras de construción dun edificio de vivendas na zona están a incumprir a normativa que establece que as ribeiras dos ríos son patrimonio público, obrigando a deixar libre unha servidume de 5 metros desde o cauce para garantir o acceso público e a protección do ecosistema.
EU advirte que esta ocupación ilegal pode provocar graves danos ao ecosistema fluvial, dificultar a súa conservación e recuperación, e incrementar os riscos en caso de inundacións. Por este motivo, presentaron un escrito formal ao concello para que tome medidas inmediatas e obrigue á construtora a retirar o peche.
