🔴 O CONCELLO DE CATOIRA MELLORARÁ A SEGURIDADE PEONIL NO PASEO DAS TORRES DO OESTE CON MALLA ANTIESVARÓNS

O Concello de Catoira anunciou a instalación inminente dunha malla antiesvaróns nas pasarelas do Paseo das Torres do Oeste, co obxectivo de mellorar a seguridade peonil nesta zona. As obras, que acaban de ser adxudicadas á empresa ‘Construcciones Lemos Martínez SL’, complementan a reforma integral do itinerario iniciada no verán, cando se substituíron as estruturas de madeira danadas polos temporais do pasado ano.

O alcalde Xoán Castaño subliña que, ata agora, as plataformas do paseo non dispoñían de ningún sistema que mitigase o risco de caídas ou tropezos accidentais causados pola choiva ou a humidade, factores moi presentes nunha área tan afectada pola auga debido ás súas características naturais. A nova malla, que será de seguridade galvanizada hexagonal grampada á madeira, non só incrementará a seguridade e confort dos usuarios, senón que tamén axudará a prolongar a vida útil das pasarelas, reducindo así o custo de mantemento.

A empresa adxudicataria conta cun prazo de dous meses para completar a instalación, aínda que o alcalde indicou que se está a negociar para reducir o tempo de execución e ter a pasarela operativa o antes posible.

Esta mellora, realizada grazas a unha subvención do Fondo de Compensación Ambiental autonómico, completa a renovación dunha parte do itinerario, que xa incluiu a reposición das estruturas de madeira danadas polos temporais de decembro de 2023. Castaño destaca que a conservación deste paseo icónico é unha prioridade para o goberno de Catoira, que busca integrar estes espazos na vida cotiá dos veciños e visitantes.