O I Campionato Basketbaia 3x3 de Catoira celebrouse este sábado con gran éxito, superando todas as expectativas e congregando a 31 equipos e máis de 120 deportistas de diversas localidades. Organizado polo Concello de Catoira e o Clube de Baloncesto Río Ulla, o evento tivo unha acollida inmellorable, destacando polo ambiente e pola excelente organización, o que foi cualificado como un “éxito rotundo” polo alcalde Xoán Castaño e o concelleiro de Deportes Raúl Gómez.
O torneo, que se desenvolveu na Alameda de Oeste diante do centro social, contou con tres campos habilitados especialmente para a ocasión. A boa participación e o ambiente animado puxeron de relevo o crecente interese polo baloncesto 3x3, unha modalidade que está en pleno auxe despois de ter debutado nos Xogos Olímpicos. Os equipos, formados por xogadores de todas as categorías, disputaron os partidos ao longo do día, xerando unha gran afluencia de público e dinamizando a vila.
Todos os participantes recibiron agasallos e os gañadores foron distinguidos con diferentes premios. O Concello de Catoira proporcionou todo o necesario para o correcto desenvolvemento da proba, incluíndo instalacións, material, auga e froita para os deportistas. Ademais, fíxose especial fincapé en garantir as medidas de seguridade e o seguro individual para cada xogador e xogadora.
O evento non só revitalizou a parroquia de Oeste, senón que tamén atraeu aos participantes ao centro da vila, beneficiando á hostalería local. Raúl Gómez, tenente de alcalde, celebrou o éxito do campionato e anunciou a intención de repetir a experiencia en futuras edicións, co obxectivo de consolidar a Catoira como un referente no ámbito deportivo.
