🔴 A CONSELLEIRA DE INDUSTRIA VISITOU A LAGOA PORTO PIÑEIRO, ONDE XUNTA E CONCELLO INVESTIRÁN 366.200 EUROS PARA MELLORAR A SEGURIDADE

A conselleira de Economía e Industria, María Jesús Lorenzana, visitou hoxe a lagoa Porto Piñeiro en Valga, onde Xunta e Concello investirán 366.200 euros para instalar unha varanda de seguridade. O convenio entre ambas administracións, aprobado esta semana polo Consello da Xunta, permitirá dotar este espazo, que antes era unha mina de arxila, dun peche de protección co obxectivo de mellorar a seguridade dos usuarios.

Durante a súa visita, a conselleira estivo acompañada polos tenentes de alcalde Román Castro e Carmen Gómez, o concelleiro Pedro Calvo e o director xeral de Planificación Enerxética e Minas, Pablo Fernández. A lagoa, cunha lámina de auga de 5,32 hectáreas, foi creada trala acumulación de augas subterráneas e pluviais na antiga mina da empresa Novo y Sierra.

O Concello de Valga ten como obxectivo un proceso de renaturalización similar ao da lagoa Mina Mercedes, co que pretende converter as lagoas nun espazo público para o disfrute da veciñanza, valorizando o patrimonio mineiro da zona.

María Jesús Lorenzana expresou a súa satisfacción pola iniciativa e destacou a importancia do convenio para que “todos os valgueses poidan desfrutar deste espazo de lecer con seguridade”. A Xunta achegará a maior parte do financiamento, mentres que o Concello contribuirá con case 70.000 euros.

Pola súa parte, o tenente de alcalde Román Castro agradeceu a colaboración da Xunta e salientou que estes fondos permitirán completar os 1.240 metros de valado necesarios para o perímetro da lagoa, dos cales só 300 están actualmente cubertos.

O proxecto integral, valorado en máis de 14 millóns de euros, inclúe actuacións como unha zona de baño con praia artificial e piscina, áreas recreativas, unha cávea natural con escenario flotante e cabanas para aloxamento. Ademais, a primeira fase, que incluíu sendas ciclables, un parque infantil e arborado, xa foi completada en 2023. O Concello tamén conta con 1,2 millóns de euros adicionais procedentes da Deputación de Pontevedra e dos fondos europeos Next Generation.