A Concellería de Promoción Económica de Vilagarcía de Arousa arranca mañá o programa “Dixitaliza Vilagarcía”, co obxectivo de impulsar a modernización e revitalización do comercio local mediante a incorporación de novas tecnoloxías e ferramentas dixitais. Dezaoito comerciantes e praceiros da localidade participarán nun ciclo de 9 sesións formativas, que lles ofrecerán asesoramento individualizado e apoio técnico para mellorar a súa presenza dixital e optimizar o seu rendemento nos novos canais de venda.
A primeira xornada, titulada “Coñece a túa audiencia”, terá lugar mañá martes e estará dividida en dúas sesións: unha dirixida aos vendedores da Praza de Abastos, que se celebrará de 16.30 a 17.30 horas nas propias instalacións do mercado, e outra para o resto dos comerciantes da vila, que se impartirá nas dependencias da firma Craftium, en rúa Duras, de 20.30 a 21.30 horas. O obxectivo desta sesión inaugural é proporcionar aos comerciantes as ferramentas necesarias para identificar e comprender ao seu público obxectivo, co fin de mellorar a súa estratexia de comunicación e marketing dixital.
Aínda que o ciclo formativo comeza agora, a empresa encargada do programa de dixitalización leva xa varias semanas traballando cos comercios inscritos, realizando un diagnóstico individualizado da situación actual de cada negocio. Esta análise inicial permite que os participantes reciban recomendacións personalizadas sobre as mellores ferramentas dixitais a implementar. As sesións formativas completaranse con novas visitas aos establecementos para deseñar conxuntamente un plan de acción que impulse o seu desenvolvemento dixital e comercial.
O programa “Dixitaliza Vilagarcía” é unha iniciativa enmarcada no proxecto “Vilagarcía Viva”, que busca promover o desenvolvemento económico local e combater a perda de competitividade do pequeno comercio fronte ás grandes plataformas dixitais. Este proxecto está financiado en boa parte polos fondos europeos Next Generation, a través do Plan de Recuperación, Transformación e Resiliencia, que destina axudas á modernización das economías locais e á súa adaptación ás novas esixencias do mercado dixital.
O concelleiro de Promoción Económica, Álvaro Carou, destacou a importancia desta iniciativa para garantir a supervivencia e competitividade do comercio local. “A dixitalización non é unha opción, é unha necesidade. Con este programa pretendemos dotar aos nosos comerciantes das ferramentas necesarias para competir nun mercado cada vez máis global e dixitalizado”, afirmou Carou.
