🔴 A EMPRESA GARANTE A FINALIZACIÓN DAS OBRAS PARA A CELEBRACIÓN DO XIII TRIATLÓN CONCELLO DE VILAGARCÍA

🔴 O deporte tomará as rúas de Vilagarcía o domingo 29 de setembro co XIII Triatlón Concello de Vilagarcía, tras a confirmación de que as obras de saneamento da avenida Valle Inclán estarán rematadas e a calzada totalmente despexada e acondicionada. A empresa concesionaria da obra de Augas de Galicia garantiu a seguridade da vía, fundamental para o desenvolvemento da proba deportiva, que fora inicialmente prevista para o 1 de setembro, pero que tivo que ser aprazada por razóns de seguridade dos ciclistas.

A Fundación Galega de Triatlón confirmou xa a participación dos 81 equipos masculinos e femininos inscritos, pertencentes ás categorías absoluta, open e escolar, nun evento que tamén forma parte do Campionato Galego por equipos contra reloxo.

O triatlón, que comezará en Vilaxoán, incluirá tramos de natación, ciclismo e carreira a pé. As distancias variarán segundo a categoría, sendo de 750 metros a nado, 20 quilómetros en bicicleta e 5 quilómetros de carreira a pé na proba absoluta e Open, mentres que na modalidade escolar os participantes percorrerán 300 metros na auga, 10 quilómetros en bicicleta e 2,5 quilómetros a pé.

O circuíto ciclista, con saída dende a explanada da rúa Preguntoiro, estenderase polas rúas de Vilaxoán e Vilagarcía, mentres que a carreira a pé terá un percorrido de dúas voltas con saída e meta tamén no peirao de Vilaxoán.

A organización, a cargo da Fundación Municipal de Deportes, prevé un gran ambiente deportivo nas rúas de Vilagarcía para este esperado evento.