🔴 O ALCALDE DE VILAGARCÍA E O CONCELLEIRO DE PROMOCIÓN ECONÓMICA REÚNENSE CO PRESIDENTE DE UPTA PARA ABORDAR A DINAMIZACIÓN DA PRAIA DA CONCHA

🔴 O alcalde de Vilagarcía, Alberto Varela, e o concelleiro de Promoción Económica e Turismo, Álvaro Carou, mantiveron hoxe unha reunión co presidente estatal da Unión de Profesionais e Traballadores Autónomos (UPTA), Eduardo Abad, e cos representantes locais da asociación, Jesús Diéguez e Reyes Casabella. A xuntanza enmárcase nas reunións periódicas que o goberno local organiza con colectivos socioeconómicos para fomentar o diálogo e a colaboración en temas de interese municipal.

O principal punto de discusión foi a dinamización da praia da Concha-Compostela, unha prioridade para o goberno local e que UPTA tamén ve como clave para o desenvolvemento económico e turístico da cidade. Ambas as partes coinciden na necesidade de potenciar o uso hostaleiro, deportivo e cultural do areal, tal e como xa está previsto no proxecto municipal.

O alcalde destacou a “actitude construtiva e proactiva” de UPTA e agradeceu a súa disposición a colaborar co Concello. Varela sinalou que o goberno local xa ten en marcha iniciativas para dotar a praia de infraestruturas deportivas e espazos para actividades culturais, en liña coas propostas presentadas por UPTA. Estas inclúen a instalación de equipamentos desmontables para a práctica de fútbol e vóley praia, así como a organización de concertos e festivais na zona máis ampla do areal, situada entre o peirao do Ramal e o parque da Concha.

Tanto o Concello como UPTA coinciden na necesidade de potenciar a oferta hostaleira durante o verán, aproveitando o atractivo natural da praia da Concha-Compostela, un espazo que, mellorado, será aínda máis demandado tanto por veciños como por visitantes.