🔴 O PP DE CATOIRA DENUNCIA A XESTIÓN ECONÓMICA DO BNG E ADVERTE QUE O CONCELLO ESTÁ AO BORDE DO “ABISMO ECONÓMICO”

O Partido Popular de Catoira lanzou unha dura crítica contra a xestión económica do goberno municipal do BNG, ao que acusa de estar levando o concello ao “abismo económico”. A voceira popular, Estefanía Frieiro, puxo de manifesto os datos recollidos na Conta Xeral de 2023, que, segundo ela, reflicten unha “nefasta xestión” con graves consecuencias para as finanzas municipais.

Frieiro subliñou que o informe da Secretaría-Intervención revela que o concello superou a regra de gasto en 379.558 euros durante o ano pasado, unha cifra que cualificou de “insostible”. Ademais, destacou que a liquidación orzamentaria de 2023 alcanzou os 3.954.538 euros, pero o remanente de tesourería foi negativo, situándose en -113.778 euros. A voceira popular tamén alertou dun incumprimento do obxectivo de estabilidade orzamentaria, cun déficit de 289.623 euros, o que indica unha capacidade de financiamento moi deteriorada.

A concelleira do PP non só criticou os datos negativos da Conta Xeral, senón que tamén fixo fincapé nas “irregularidades” detectadas no manexo dos recursos públicos. Entre estas, sinalou a existencia de tres suplementos de crédito que, segundo Frieiro, non foron tramitados conforme ao procedemento legal nin aprobados polo pleno da corporación, o que representa unha grave falta de transparencia e legalidade.

Outro punto de preocupación para o PP é o elevado número de reparos realizados por Intervención en relación cos gastos do concello, que inclúen obras, servizos, horas extraordinarias e subvencións. En particular, Frieiro denunciou un exceso de 1.874 horas extra por parte do persoal municipal, sen o debido control. Tamén destacou que se concederon subvencións sen seguir o procedemento regrado nin a xustificación correspondente, o que agrava a situación financeira do concello.

Ante este panorama, Estefanía Frieiro instou ao alcalde e ao goberno do BNG a adoptar unha política económica máis moderada e responsable. Solicitou a aplicación dunha estratexia de contención do gasto público, respectando as fases orzamentarias e corrixindo os problemas relacionados cos suplementos de crédito. Tamén pediu unha planificación efectiva dos recursos humanos municipais para garantir unha prestación eficiente dos servizos públicos, axustada aos fondos dispoñibles.

Por último, a voceira popular reclamou a aprobación dun plan de contratación para o presente ano e a licitación de subministracións como limpeza, informática, axuda no fogar, telefonía, seguros e materiais, co fin de evitar futuros reparos e mellorar a transparencia e a eficiencia na xestión dos recursos públicos.

“O balance económico de 2023 é desastroso e revela unha longa lista de irregularidades que son a proba da mala xestión do BNG en Catoira”, concluíu Frieiro, quen acusou ao alcalde de presentarse como defensor da legalidade e a transparencia, cando na práctica, segundo ela, se comporta como “un mal cacique”.