🔴 O PP DE VILAGARCÍA DENUNCIA FILTRACIÓNS DE AUGA NAS OBRAS DA PISCINA MUNICIPAL

O Partido Popular de Vilagarcía denunciou hoxe que a fachada sur da piscina municipal, recentemente reformada, presenta filtracións de auga. O problema localízase na cristalera da piscina, tamén coñecida como muro cortina, onde esta mañá se observaron pingueiras de auga. “É unha chapuza enorme”, afirmou a portavoz do PP, Ana Granja, tras recibir imaxes enviadas por usuarios da piscina que evidencian as filtracións.

Os populares critican duramente ao alcalde Alberto Varela, sinalando que presumiu de rematar as obras con 11 días de antelación, pero “a obra non está terminada e, aínda por riba, mete auga”. Tamén subliñan que, a pesar de que o goberno local asegurou que os traballos exteriores estarían listos o 2 de setembro, aínda non están finalizados.

O Partido Popular pide explicacións e responsabilidades ao goberno local, destacando que esta primeira fase das obras tivo un custo de preto de 500 mil euros e que os traballos, que tiñan un prazo de execución de 3 meses, comezaron en novembro e aínda continúan. “É unha mostra máis das falsas promesas de Varela e da incapacidade do seu equipo para rematar unha obra en tempo e forma”, afirmou Granja.

A formación tamén lamenta que os usuarios da piscina se vexan de novo afectados por estes problemas, que consideran unha vergoña para a imaxe da instalación, e temen que as filtracións volvan influír negativamente no número de socios da piscina.