🔴 A ASOCIACIÓN DE VECIÑOS DE CORNAZO DENUNCIA O ABANDONO E A FALTA DE CONSIDERACIÓN DO GOBERNO LOCAL NA PARROQUIA

🔴 A Asociación de Veciños “Agustín Romero” de Cornazo vén de denunciar publicamente o desleixo do Concello de Vilagarcía na execución de diversas peticións comprometidas para a parroquia polo alcalde e varios concelleiros do grupo de goberno.

Segundo afirman dende a asociación, tras facer unha análise das actuacións solicitadas nos últimos meses e constatar que poucas foron atendidas, conclúen que existe unha falta de consideración absoluta por parte do goberno local cara a parroquia. Entre as demandas sen resolver destacan cuestións que afectan á seguridade e benestar da veciñanza, como o calmado do tráfico en pistas sen beirarrúas ou o arranxo de fochancas que dificultan a circulación.

Ademais, denuncian a falta de mantemento nos camiños rurais, que, debido á maleza, convertéronse en auténticos sendeiros boscosos. A asociación critica que, a pesar das reiteradas solicitudes verbais e escritas, o Concello non atendeu estas reclamacións.

Os veciños tamén poñen o foco no abandono de fontes e lavadoiros históricos, que levan anos sen recibir atención por parte das autoridades locais. Critican que mentres se anuncian grandes investimentos no centro de Vilagarcía, o rural continúa sendo ignorado.

A asociación insiste en que a veciñanza de Cornazo paga os seus impostos como calquera outro residente do municipio e esixe igualdade de trato. “Non somos cidadáns de segunda nin de terceira”, conclúen.