🔴 CAROU DESTACA NA SESIÓN EXTRAORDINARIA DA MESA DE COMERCIO DE VILAGARCÍA O INCREMENTO DO 35% DE AXUDAS A EMPRENDEDORES.

O concelleiro de Promoción Económica, Álvaro Carou, presidiu onte unha sesión extraordinaria da Mesa de Comercio de Vilagarcía, onde participaron representantes de grupos políticos e asociacións comerciais, incluíndo Zona Aberta, o Centro Comercial e as dúas asociacións da praza de abastos. Nesta reunión, tamén se contou por primeira vez coa presenza telemática da dirección xeral de Comercio da Xunta de Galicia.

Durante o encontro, revisáronse os investimentos e actividades de dinamización que o concello vén desenvolvendo para promover o comercio local e a praza de abastos, incluíndo melloras nas instalacións con fondos europeos e un aumento dos servizos. Estas iniciativas levaron á praza de abastos de Vilagarcía a recibir o selo de mercado excelente outorgado pola Xunta de Galicia.

Carou destacou o incremento nun 35% das axudas para emprendedores e novos traballadores, con 60.000 euros dispoñibles en cada categoría. Tamén se anunciou a sinatura dun convenio coa Cámara de Comercio de Pontevedra, Vigo e Vilagarcía para fomentar o emprendemento e a formación.

Outras iniciativas subliñadas inclúen campañas de comunicación, a compra dun vehículo eléctrico para reparto, reformas na praza da verdura, e a instalación de taquillas intelixentes, puntos de recarga eléctrica e paneis solares en Vilaxoán. O concelleiro avanzou que a Mesa de Comercio se reunirá máis veces ao ano para garantir a participación activa do sector na toma de decisións co obxectivo de manter a Vilagarcía como referente do comercio de proximidade.