🔴 A MANCOMUNIDADE DO SALNÉS CULMINA CON ÉXITO O SERVIZO DE TRANSPORTE GRATUÍTO DURANTE A FESTA DO MARISCO

A Mancomunidade de O Salnés, en colaboración coa empresa Tintilan, puxo en marcha unha iniciativa de transporte gratuíto durante a Festa do Marisco, que permitiu a locais e turistas gozar dunha experiencia enriquecedora percorrendo a comarca de O Salnés. Esta acción, financiada a través do “Convenio de Colaboración entre a Axencia Turismo de Galicia e a Mancomunidade do Salnés para a Execución de Actividades de Promoción do Turismo no Xeodestino O Salnés”, superou as expectativas de demanda e foi moi ben recibida polo público.

O servizo de autobús turístico, que funcionou durante a fin de semana do 11 ao 13 de outubro, rexistrou un nivel de ocupación destacado: o venres acadou o 70% da súa capacidade, o sábado chegou ao 100%, habilitándose prazas adicionais, e o domingo pechou cun 95% de ocupación. Estes datos reflicten o interese tanto de veciños coma de visitantes pola iniciativa. En canto ao perfil dos usuarios, o 50% eran locais e o 50% turistas, con presenza de italianos, ingleses, ucraínos e suramericanos, ademais de visitantes de diferentes rexións de España.

Os usuarios valoraron positivamente o servizo, especialmente a audioguía da ruta, que ofrecía unha descrición detallada dos puntos de interese. A metade dos pasaxeiros realizaron a ruta completa sen paradas, mentres que o resto optou por deterse, principalmente na Festa do Marisco. Tamén se observou que varios visitantes aloxados en O Grove empregaron o autobús para explorar outras zonas da comarca, destacando a importancia deste tipo de transporte turístico.

A Mancomunidade de O Salnés percibe esta iniciativa como unha proba clara da necesidade de servizos de transporte turístico a nivel comarcal, e valora a posibilidade de replicala noutros eventos da comarca para promover o desenvolvemento económico e social da zona.