🔴 O PP SOLICITA NO CONGRESO A CONSTRUCIÓN DUN NOVO CUARTEL DA GARDA CIVIL EN VILAGARCÍA E CRITICA O ABANDONO DO GOBERNO

Os deputados do Partido Popular, Irene Garrido, Pedro Puy e Juan Bayón, presentaron unha Proposición non de Lei no Congreso dos Deputados para solicitar a construción dun novo cuartel da Garda Civil en Vilagarcía de Arousa. Segundo Juan Bayón, o cuartel actual, construído en 1962, apenas recibiu melloras ao longo dos anos, polo que resulta inadecuado para os tempos actuais.

No ano 2019, o goberno de Pedro Sánchez incluíra unha partida orzamentaria para construír un novo cuartel en Vilagarcía, pero tras as eleccións, a inversión foi suprimida. Desde entón, o PP de Vilagarcía vén reclamando que o goberno rectifique esa decisión. A proposición presentada insta ao Ministerio do Interior a priorizar a construción dun novo cuartel ou, no seu defecto, a realizar unha rehabilitación integral do existente.

Bayón subliñou que permitir que a Garda Civil abandone Vilagarcía causaría un “dano irreparable”, e lamentou que a capitanía da Garda Civil fose trasladada a Cambados este ano, o que considera un agravio para Vilagarcía. Tamén criticou que o alcalde de Vilagarcía, Alberto Varela, non se pronunciase sobre este tema.

Ademais, na proposición, o PP solicita que o Ministerio cubra as vacantes de axentes na provincia de Pontevedra, onde actualmente faltan 283 gardas civís para completar o catálogo de persoal aprobado.