🔴 𝐀 𝐗𝐔𝐍𝐓𝐀 𝐃𝐄𝐒𝐓𝐈𝐍𝐀 𝟗,𝟐 𝐌𝐈𝐋𝐋Ó𝐍𝐒 𝐏𝐀𝐑𝐀 𝐎 𝐍𝐎𝐕𝐎 𝐂𝐄𝐍𝐓𝐑𝐎 𝐃𝐄 𝐒𝐀Ú𝐃𝐄 𝐃𝐄 𝐕𝐈𝐋𝐀𝐆𝐀𝐑𝐂Í𝐀, 𝟕𝟐𝟗.𝟖𝟐𝟒 € 𝐏𝐀𝐑𝐀 𝐎 𝐂𝐄𝐈𝐏 𝐒𝐄𝐒𝐓𝐄𝐋𝐎-𝐁𝐀𝐈Ó𝐍 𝐄𝐍 𝐕𝐈𝐋𝐀𝐍𝐎𝐕𝐀 𝐄 𝟐𝟒𝟐.𝟗𝟓𝟎 € 𝐏𝐀𝐑𝐀 𝐎 𝐏𝐎𝐑𝐓𝐎 𝐏𝐈Ñ𝐄𝐈𝐑𝐎 𝐄𝐍 𝐕𝐀𝐋𝐆𝐀

A Xunta de Galicia asignará preto de 48 millóns de euros para a comarca do Salnés nos orzamentos de 2025, destinando importantes partidas a diversos concellos. Entre os proxectos máis destacados, Vilagarcía de Arousa recibirá 9,2 millóns de euros para a construción dun novo centro de saúde, ademais de 2,1 millóns para a ampliación do CIFP Fontecarmoa e 800.000 € para o equipamento do Hospital do Salnés.

En Cambados, destinaranse 850.000 € para a ampliación do CEIP San Tomé, mentres que Sanxenxo contará con 545.000 € para a construción de departamentos de usuarios no seu porto. Vilanova de Arousa recibirá 729.824 € para a cuberta da pista do CEIP Sestelo-Baión e Valga contará cunha partida de 242.950 € para a recuperación do Porto Piñeiro.

Outros proxectos na comarca inclúen a ampliación do CEIP Plurilingüe Arealonga en Vilagarcía (640.000 €), a remodelación dos xulgados (240.000 €), así como a mellora de infraestruturas no Polígono Industrial do Pousadoiro (158.236 €). En Sanxenxo, tamén destacan as obras no CEIP de Portonovo (248.000 €). Pola súa parte, en Cambados, ademais das melloras no CEIP San Tomé, hai 180.000 € destinados á iluminación do Porto de Tragove.

Nos concellos de O Grove, Meaño e Ribadumia, o CEIP Rosalía de Castro, o CEIP Coirón-Dena e o CPI Julia Becerra contarán con 300.000 € respectivamente para melloras nas súas infraestruturas.

O delegado territorial da Xunta, Agustín Reguera, destacou o carácter social dos orzamentos, subliñando que a Xunta mantén o seu compromiso cunha provincia de Pontevedra máis atractiva, confortable e saudable para os veciños.