🔴 OS ALCALDES SOCIALISTAS DE VILAGARCÍA, ILLA DE AROUSA, O GROVE E CAMBADOS APOIAN A ILP PARA A PROTECCIÓN DAS ACTIVIDADES PESQUEIRAS E MARISQUEIRAS TRADICIONAIS

Os alcaldes socialistas dos municipios de Vilagarcía de Arousa, Illa de Arousa, O Grove e Cambados manifestan publicamente o seu apoio á Iniciativa Lexislativa Popular (ILP) para o Recoñecemento e Protección das Actividades Pesqueiras e Marisqueiras Tradicionais. Esta ILP, que conta co respaldo de milleiros de sinaturas, será debatida no Parlamento de Galicia o próximo 22 de outubro.

O sector pesqueiro e marisqueiro tradicional é esencial para a economía destes municipios, xerando miles de empregos directos e indirectos. Demostrou ser unha fonte de estabilidade, mesmo durante crises como a financeira e a pandemia da COVID-19. A ría de Arousa concentra o 44% do marisqueo a pé de Galicia, o 40% das embarcacións pesqueiras e marisqueiras e o 70% das bateas de mexillón, converténdose así nun dos piares socioeconómicos da comarca.

Ademais, os produtos do mar forman parte da identidade cultural e gastronómica da zona. Este valor tamén está presente no turismo, que depende da calidade das augas, o prestixio dos produtos do mar e a vida vinculada ao litoral.

Os alcaldes consideran que o sector pesqueiro e marisqueiro tradicional debe ser recoñecido como actividade de interese xeral, ao igual que outros sectores clave da economía galega. Subliñan a necesidade de outorgarlle este status legal, que garantiría a súa protección e promoción, ademais de asegurar a súa sustentabilidade a longo prazo.

Así mesmo, consideran fundamental que os Plans de Ordenación do Espazo Marítimo prioricen as actividades do sector marítimo tradicional. Propoñen que a Consellería do Mar emita un informe preceptivo para evitar que proxectos contaminantes ou que ocupen o mesmo espazo poñan en perigo esta fonte de riqueza e emprego.

Finalmente, os alcaldes instan aos grupos parlamentarios a votar a favor da ILP, recoñecendo a importancia vital do sector pesqueiro e marisqueiro para o desenvolvemento económico, social e cultural de Galicia.