🔴 PORTOS DE GALICIA ACLARA QUE A COMPETENCIA SOBRE A REXENERACIÓN DA PRAIA DO PREGUNTOIRO EN VILAXOÁN CORRESPONDE AO ESTADO

Portos de Galicia lembra que a responsabilidade da rexeneración da praia do Preguntoiro, situada en Vilaxoán, Vilagarcía de Arousa, pertence á Demarcación de Costas do Estado, dependente do Ministerio de Transición Ecolóxica, e non á Xunta de Galicia a través deste ente público.

Ante as dúbidas manifestadas polo Concello de Vilagarcía en relación á titularidade da praia, Portos de Galicia clarifica que, se ben parte do areal se atopa en terreo portuario, esta zona non coincide coa área afectada pola perda de area.

O organismo público subliña que a praia mantén as súas condicións naturais e non foi alterada por infraestruturas portuarias, nin existe evidencia de que estas teñan exercido efectos negativos sobre o conxunto do areal. De feito, o Goberno central recoñeceu o 2 de marzo de 2023, en resposta a unha pregunta no Congreso dos Deputados, que a praia “non presenta ningún problema en relación coa dinámica litoral e a súa evolución natural”.

En canto á responsabilidade sobre a rexeneración, Portos de Galicia descarta a posibilidade de intervención do ente, xa que o artigo 111 da Lei de Costas do Estado establece que “terán cualificación de obras de interese xeral e serán competencia da Administración do Estado as de creación, rexeneración e recuperación de praias”.

Esta competencia xa foi exercida polo Estado, segundo informa o Ministerio de Transición Ecolóxica na súa web. A actuación de rexeneración da praia de Preguntoiro foi completada en 2015 cun orzamento de 112.227,50 euros. Ademais, Costas do Estado non solicitou autorización á Xunta de Galicia para esta intervención na franxa de praia de titularidade de Portos de Galicia, ao ser unha actuación de interese xeral competencia do Estado.