O alcalde de Cambados, Samuel Lago, pediu publicamente ao Partido Popular, liderado por Sabela Fole, que aclare a súa postura respecto ás declaracións realizadas por Juan Bayón sobre o
cuartel da Guardia Civil. Segundo Lago, as palabras de Bayón, que xeraron unha importante polémica no municipio, non poden ser ignoradas polo PP local, que, ata o momento, non se ten pronunciado ao respecto.
Samuel Lago esixiu unha resposta clara e urxente por parte de Sabela Fole e o seu grupo político, subliñando que “non se pode mirar cara outro lado ante unha cuestión tan sensible”. O alcalde engadiu que o futuro e o funcionamento das instalacións da Garda Civil son de gran relevancia para a seguridade e o benestar da veciñanza, polo que calquera comentario ao respecto debe ser tratado con seriedade, ademais indicou que está era “unha maniobra malintencionada que busca perxudicar a Cambados. É importante lembrar que Vilagarcía é zona de demarcación da Policía Nacional e pola tanto é este corpo o responsable da seguridade nese municipio e non a Garda Civil, mentres que a sede natural da Compañía da Garda Civil é Cambados dende onde presta servizo a toda a comarca e onde reside xa a capitanía da Compañía”
O silencio do PP ante estas declaracións está a ser percibido por Lago como unha falta de compromiso cos asuntos cruciais do municipio, e insistiu en que a cidadanía ten dereito a saber cal é a postura do partido. “Se non se posicionan claramente, podería entenderse que están de acordo coas palabras de Bayón”, advertiu o alcalde.
As palabras de Juan Bayón sobre o cuartel da Guardia Civil seguen sendo tema de debate, mentres a comunidade de Cambados agarda unha resposta oficial por parte do PP local para disipar a polémica.
