🔴 𝐒𝐀𝐍𝐗𝐄𝐍𝐗𝐎 𝐏𝐀𝐑𝐓𝐈𝐂𝐈𝐏𝐀 𝐏𝐎𝐑 𝐏𝐑𝐈𝐌𝐄𝐈𝐑𝐀 𝐕𝐄𝐙 𝐍𝐎 𝐏𝐑𝐎𝐆𝐑𝐀𝐌𝐀 𝐕𝐈𝐋𝐀𝐒 𝐄𝐍 𝐅𝐋𝐎𝐑 𝐏𝐀𝐑𝐀 𝐏𝐎Ñ𝐄𝐑 𝐄𝐍 𝐕𝐀𝐋𝐎𝐑 𝐀 𝐒Ú𝐀 𝐑𝐈𝐐𝐔𝐄𝐙𝐀 𝐍𝐀𝐓𝐔𝐑𝐀𝐋 𝐄 𝐏𝐀𝐈𝐒𝐀𝐗Í𝐒𝐓𝐈𝐂𝐀

🔴 O Concello de Sanxenxo súmase este ano, por primeira vez, ao programa Vilas en Flor co obxectivo de poñer en valor a súa riqueza natural e paisaxística

. A Concellería de Medio Ambiente, dirixida por Yago Torres, presentou unha memoria detallada das 220 zonas verdes municipais, así como doutros espazos de alto valor natural, como o complexo intermareal da Ría de Arousa. “Cremos que é importante seguir apostando pola mellora da calidade de vida dos nosos veciños mediante a creación e coidado de novas zonas verdes”, subliña Torres.

🔴 A decisión final coñecerase o vindeiro venres 15 de novembro, cando se fará pública a cantidade de Flores de Honra que Sanxenxo recibirá, nunha escala de ata cinco. O acto de entrega celebrarase na Casa do Concello de Salvaterra do Miño, ás 12 horas.

🔴 Vilas en Flor é un programa que busca destacar a riqueza natural e paisaxística a través do recoñecemento de proxectos de xardinaría, ornamentación floral, mobiliario urbano e espazos lúdicos exemplares. As Flores de Honra son distintivos anuais que un xurado especializado concede aos municipios participantes.

O programa Vilas en Flor segue a liña doutros proxectos semellantes en países como Francia (Villes et Villages Fleuris), Italia (Comuni Fioriti), Reino Unido (Britain in Bloom), Irlanda (Tidy Towns) e Canadá (Communities in Bloom).

A iniciativa está impulsada por Asvinor e Agaexar, e conta co apoio e coordinación da Fundación Juana de Vega, no marco do seu traballo pola mellora integral do territorio e a paisaxe. Actualmente, participan 42 municipios galegos, todos cunha poboación menor de 40.000 habitantes.