🔴 O PP DE CAMBADOS CRITICA A XESTIÓN DO CUATRIPARTITO NOS SERVIZOS SOCIAIS E NO FUTURO DO ASILO ACUSA AO GOBERNO LOCAL DE “INACCIÓN E ELECTORALISMO”

 O Partido Popular de Cambados expresou nun comunicado a súa “profunda decepción” coa xestión do goberno local cuatripartito en relación ao peche do Asilo, a futura construción dunha residencia na comarca do Salnés e as políticas sociais en xeral. A portavoz do PP, Sabela Fole, acusou ao executivo municipal de “protestar sen ofrecer solucións” e de estar “máis preocupado por manter cargos que por gobernar para os veciños”.

Os populares defenderon a postura da Xunta de Galicia, que descartou converter o Asilo nunha residencia pública debido ao elevado custo de adquisición e rehabilitación do Pazo de Montesacro, estimado en 4 millóns de euros. “O cuatripartito local fala alegremente de diñeiro público, pero a Xunta é respectuosa cos cartos de todos os galegos”, argumentaron desde o PP.

O comunicado tamén critica a negativa do goberno municipal a liderar a compra do Pazo de Montesacro. “En setembro de 2023, o PP presentou unha moción para que o Concello asumise esta responsabilidade e negociase achegas doutras administracións, pero PSOE, Somos e BNG votaron en contra, rexeitando unha oportunidade para preservar o noso patrimonio histórico”, explicou Fole.

En canto á demanda dunha residencia pública, o PP considera que o interese do goberno local “é meramente electoralista”. Lembraron que Cambados non optou ao concurso aberto pola Xunta en 2022 para residencias públicas, do que se beneficiaron outros concellos da provincia como Dozón e Fornelos de Montes.

Por último, os populares valoraron como “positiva” a intención anunciada pola Mancomunidade do Salnés de promover unha residencia comarcal, pero lamentaron que Cambados non teña “liderado esta iniciativa” para suplir a falta dunha infraestrutura deste tipo no municipio.