Carmen González Castro, veciña de Portonovo, celebrou hoxe os seus 100 anos converténdose na cuarta persoa centenaria da parroquia. A alcaldesa en funcións, Paula Martínez, e a concelleira de Servizos Sociais e Maiores, Paz Lago, visitaron o seu domicilio na zona de A Perla para felicitala persoalmente e entregarlle un ramo de flores en nome do Concello.
Carmen estivo arroupada durante a celebración por dous dos seus fillos coas súas respectivas parellas, así como pola súa neta, nun ambiente familiar e emotivo que encheu o seu fogar de alegría neste día tan especial.
Dende o Concello de Sanxenxo destacaron o orgullo de contar con veciñas como Carmen, que son un exemplo de vitalidade e historia viva da comunidade. A visita forma parte do compromiso municipal de recoñecer e celebrar o papel das persoas maiores na sociedade.
