O Grupo Municipal de Esquerda Unida (EU) acusa á voceira socialista Tania García de mentir no pleno do pasado luns ao defender que a reforma da taxa pola recollida de lixo non suporía que as vivendas turísticas pagasen menos que as habituais. Segundo EU, esta afirmación é “rotundamente falsa”, como se evidencia na gráfica que acompaña o comunicado. Nel obsérvase que unha vivenda turística pode pagar ata 100 euros menos que unha habitual.
Esquerda Unida critica que a ordenanza aprobada polo bipartito local permite que os propietarios de vivendas destinadas a uso turístico obteñan descontos de ata 100 euros no caso de inmobles dun dormitorio e de 46 euros para aqueles de tres dormitorios. Pola contra, as familias que ocupan vivendas habituais afrontan un custo maior na taxa do lixo, o que EU considera un trato inxusto e favorable aos especuladores da vivenda.
O grupo municipal lembra tamén que Tania García ten un “historial de mentiras” no pleno da corporación, acusándoa de falsificar información sobre o tráfico no mercado nunha intervención anterior. Neste caso, consideran que o BNG, como socio do PSOE no goberno local, tamén é responsable por apoiar unha decisión que “sangra ás familias” mentres beneficia aos propietarios de vivendas turísticas.
EU insta ao goberno local a seguir o exemplo de concellos como A Illa ou Caldas de Reis, que estableceron unha reforma máis xusta para as taxas de lixo. Ademais, censuran que o pleno fose convocado de forma “furtiva” un luns pola mañá, o que atribúen á intención de facilitar a asistencia de membros do goberno a eventos persoais.
Finalmente, Esquerda Unida pide que se respecte o horario ordinario dos plenos, habitualmente programados para o último xoves de cada mes, así como as xuntanzas previas cos voceiros dos diferentes grupos.
