🔴 O GOBERNO DE VILAGARCÍA DEFENDE A XESTIÓN DA EDUSI ANTE AS ACUSACIÓNS DO PP E ESIXE RECTIFICACIÓN

O grao de execución da Estratexia de Desenvolvemento Urbano Sostible e Integrado (EDUSI) “Vilagarcía Avanza” foi do 63,16% a data de outubro de 2024, momento no que o proxecto foi oficialmente pechado tras recibir o último oficio do Ministerio de Política Territorial sobre a cuarta e última SPB (Solicitude de Pago de Beneficiarios). Este dato desmonta as acusacións do Partido Popular, que no pleno de setembro alegou que a concelleira de Urbanismo, Paola María, mentiu ao presentar o balance de execución.

Segundo o goberno local, as cifras nas que se basea o PP son de decembro de 2023, ignorando que os prazos de xustificación foran ampliados. A xestión final da EDUSI supuxo un investimento real de 3.947.616,90 euros, correspondente ao 63,16% dos 6.250.000 euros totais. Destes, o 80% procedía de fondos europeos e o 20% de fondos locais.

O executivo liderado por Alberto Varela criticou con dureza a actitude do PP, acusándoo de “descoñecer o funcionamento dos fondos europeos”. En palabras do goberno, “ou o PP minte deliberadamente ou non entende como funcionan estes mecanismos, ou ambas as cousas. Se a portavoz do PP tiña previsto mercar un coche e finalmente non o fai, non perde ese diñeiro, simplemente non o gasta. Iso é o que pasou co 20% de fondos locais non executados”.

“NON EXECUTAR NON É PERDER”

O goberno local tamén rebateu as propostas do PP, como empregar fondos EDUSI para o pavillón de Bamio, recordando que ese proxecto non era “elixible” pola natureza urbana dos investimentos contemplados. “Agora entendemos por que o PP nunca foi quen de xestionar fondos europeos mentres gobernou”, apuntaron.

Por último, insistiron en que a concelleira Paola María non faltou á verdade no pleno de setembro, cando estimou un grao de execución entre o 60 e o 70%, á espera dos datos definitivos. “O único certo é que grazas a esta xestión investíronse case 4 millóns de euros en Vilagarcía, unha cifra significativa que, ao parecer, o PP non é quen de recoñecer”.

Deste xeito, o goberno local insta ao PP a rectificar e a asumir as súas responsabilidades pola “confusión deliberada” ou “desinformación” que trasladaron á cidadanía.