🔴 O PP DE VILAGARCÍA PIDE O CESE INMEDIATO DA CONCELLEIRA DE URBANISMO POLO MAL USO DOS FONDOS EDUSI

O Partido Popular de Vilagarcía esixiu o cese inmediato da concelleira de Urbanismo e directora dos fondos Edusi, Paola María Mochales, tras coñecer a resposta do Goberno Central a unha pregunta rexistrada polo concelleiro e deputado nacional, Juan Bayón. Segundo o Executivo de Pedro Sánchez, o goberno de Vilagarcía só executou válidamente 3,4 millóns dos 6,25 aprobados, en contra dos 4,118 millóns que a concelleira asegurou ter xustificado no pleno de setembro.

Os populares lamentan a perda de case 2,8 millóns de euros, que, segundo a portavoz Ana Granja, poderían terse destinado a proxectos necesarios como a renovación do pavillón de Bamio, a rehabilitación do balneario ou o hórreo da Xunqueira. Ademais, destacan que as palabras de Paola María no pleno foron “mentiras flagrantes”, ao asegurar que os proxectos da piscina, o pavillón de Fontecarmoa e o acceso a Matosinhos estaban debidamente xustificados. Segundo o PP, estes proxectos suporán perdas de máis de 100.000 euros en cada un dos dous primeiros e de 60.000 euros no último.

Os populares tamén denuncian que a mala xestión do goberno local, liderado por Alberto Varela, suporá un custo adicional para os veciños de Vilagarcía, xa que o Concello terá que asumir con fondos propios as cantidades perdidas. “Paola María non só enganou ao Partido Popular, senón a toda a veciñanza de Vilagarcía. Por iso, pedimos ao alcalde que actúe con responsabilidade e a cese de inmediato”, sentenciou Ana Granja.