🔴 TOURÍS SUPERVISA O REMATE DAS OBRAS DE MELLORA EN TRABANCA SARDIÑEIRA, FINANCIADAS POLA DEPUTACIÓN

O deputado de Acción Comunitaria, Equipamentos Públicos e Finca Areeiro, Javier Tourís, visitou este mércores, xunto co alcalde de Vilagarcía, Alberto Varela, as obras de mellora e acondicionamento de acceso á contorna de Trabanca Sardiñeira, recentemente finalizadas. A intervención reorganizou este espazo, facilitando a conexión entre a zona urbana e o acceso ao mar a través dun túnel baixo a vía férrea.

Tourís destacou que a actuación supuxo “un cambio substancial que vai mellorar a vida da veciñanza da zona”, promovendo a integración paisaxística e incrementando a seguridade para o uso público. Cun investimento de 160.000 euros, financiado ao 100% pola Deputación de Pontevedra a través do plan provincial de obras, estas melloras forman parte dun dos maiores investimentos realizados pola institución provincial.

Os traballos incluíron:

• Escaleiras e graderíos con pasamáns de aceiro cortén, que tamén soportan iluminación integrada.

• Pavimentos antideslizantes de formigón.

• Elementos de mobiliario urbano, como bancos e barandas.

• Zonas axardinadas con especies autóctonas.

• Espazos acondicionados para garantir a accesibilidade.

Con esta actuación, o espazo de Trabanca Sardiñeira foi completamente transformado, ofrecendo un lugar máis seguro, funcional e integrado na paisaxe natural, en beneficio da veciñanza de Vilagarcía.