🔴 CAMBADOS LOGRA A DESAFECTACIÓN DOS TERREOS DE O POMBAL, UN PASO HISTÓRICO PARA AS SÚAS INFRAESTRUTURAS DEPORTIVAS

O alcalde de Cambados, Samuel Lago, acadou onte un importante logro para o futuro das infraestruturas deportivas do municipio. Tras unha reunión celebrada en Madrid coa Directora Xeral da Costa e o Mar, Ana María Oñoro, e coa Subdirectora Xeral de Dominio Público, Ainhoa Pérez, o Concello conseguiu a conformidade para a desafectación dos terreos que albergan as instalacións deportivas de O Pombal. Este acordo, que chega tras máis de dous anos de intensas xestións, abre a porta a investimentos e melloras que consolidarán este complexo como un referente deportivo na comarca.

Os terreos afectados comprenden unha superficie de 56.556 m² e foran outorgados ao Concello mediante dúas concesións administrativas, en 1988 e 1991, cunha vixencia de 30 anos. Durante este tempo permitiron a construción de importantes infraestruturas deportivas, como pistas de atletismo, campos de fútbol, un pavillón polideportivo e a piscina municipal. Non obstante, ao expirar a concesión en xullo de 2021, o uso destes terreos quedou condicionado a limitacións administrativas que impedían acometer reformas ou proxectos necesarios para a súa modernización.

UNHA SOLUCIÓN DEFINITIVA

A solución acadada onte supón a desafectación destes terreos e a súa cesión gratuíta ao Concello, que pasará a ser o titular exclusivo. Este proceso baséase na perda das características marítimo-terrestres dos terreos e no seu uso exclusivamente público, condicións fundamentais para desbloquear a situación. O acordo permite ao Concello retomar a iniciativa sobre o futuro das instalacións deportivas e planificar as inversións necesarias para optimizar o seu uso e adaptalas ás necesidades da veciñanza.

O alcalde Samuel Lago destacou a importancia deste logro: “É un paso histórico para Cambados. Estes terreos, que durante décadas foron esenciais para o deporte e o lecer, serán finalmente propiedade municipal. Isto permitirá garantir o seu uso público e continuar investindo na súa mellora. Quero agradecer a colaboración de todas as administracións implicadas, cuxo traballo conxunto fixo posible esta solución”.

UN REFERENTE DEPORTIVO NA COMARCA

Co desbloqueo destes terreos, o Concello poderá executar proxectos de mellora nas pistas de atletismo, os campos de fútbol e as instalacións cubertas, co obxectivo de modernizalas e adaptalas a novos usos deportivos e sociais. “O Pombal ten o potencial de converterse nunha referencia para o deporte en toda a comarca do Salnés”, sinalou Lago.

O acordo non só mellorará as condicións para a práctica deportiva, senón que tamén reforza o compromiso do Concello de Cambados coa xestión eficiente dos seus recursos e o desenvolvemento sostible. Este proxecto, que beneficiará a miles de veciños, marca un antes e un despois na historia das infraestruturas deportivas da localidade.