🔴 O CONCELLO INICIA AS OBRAS DE REHABILITACIÓN DA CUBERTA DA CASA CONSISTORIAL PARA FREAR AS FILTRACIÓNS

O Concello puxo en marcha as obras de rehabilitación da cuberta do edificio histórico da casa consistorial, despois de detectar filtracións no Salón Nobre e na antesala que dá ao balcón principal. A actuación, cun orzamento de 47.000 euros, busca evitar danos nos teitos e elementos decorativos interiores.

Os traballos céntranse en 2/3 do tellado, correspondentes á parte sur e leste da construción. Segundo os técnicos de urbanismo, o problema fundamental orixínase no desprazamento dunha parte do tellado, que foi detido polo canlón. Ademais, detectáronse tellas rotas e a proliferación de plantas nas cornixas.

A empresa adxudicataria, César Paz S.L., xa comezou a montar os andamios. As actuacións inclúen desmontar as zonas danadas, substituír as tellas, reforzar a estrutura, e limpar e reparar os canlóns atascados. A intervención permitirá tamén avaliar o estado das láminas de fibrocemento situadas baixo as tellas.

Este edificio, parte do patrimonio local, data de finais do século XIX e foi deseñado por Alejandro Sesmeros, tamén autor do Palacio da Deputación de Pontevedra. A última revisión do tellado realizouse no ano 2003, cando foi derrubada a ampliación feita nos anos cincuenta para construír o actual edificio moderno.