🔴 O PP DE VILAGARCÍA CRITICA A “MALA XESTIÓN, ENDEBEMENTO E OPACIDADE” DO GOBERNO DE VARELA EN 2024

O Partido Popular de Vilagarcía realizou un balance negativo do 2024 para o municipio, cualificando a política do goberno socialista de Alberto Varela como un ano marcado pola “mala xestión, o endebedamento e as mentiras”. Segundo a portavoz popular, Ana Granja, o executivo local estivo máis preocupado polos seus “líos internos” que por atender as necesidades dos vilagarciáns.

Os populares subliñan que os constantes atrasos en proxectos clave, como os vestiarios da piscina municipal, o pavillón de Fontecarmoa ou o acceso a Trabanca Sardiñeira, exemplifican a falta de eficiencia do goberno local. “Estes proxectos deberían terse rematado en 2023 e aínda así supuxeron perdas de fondos europeos por valor de 2 millóns de euros, que agora terán que pagar os veciños”, denunciou Granja.

Outros exemplos de mala planificación apuntados polo PP inclúen a obra da praza de Vilaxoán, iniciada sen alternativa para as praceiras, as interrupcións nas beirarrúas de Ameixeiras e o skatepark prometido no anterior mandato, que aínda non ten data de finalización.

En canto aos orzamentos de 2024, acordados co BNG e aprobados con seis meses de atraso, o PP cualifícaos de “irresponsables” e acusa o goberno local de hipotecar o futuro do municipio cun préstamo de 5 millóns de euros. Para Granja, isto evidencia a “incapacidade do goberno para xestionar os recursos municipais con eficiencia”.

Ademais, os populares critican a falta de transparencia e a perda de credibilidade do equipo de Varela, mencionando o caso dos fondos europeos Edusi, onde a concelleira Paola María “mentiu no pleno municipal” para ocultar a perda de 2,5 millóns de euros.

Pese a este panorama, Ana Granja destacou o traballo do seu grupo municipal, afirmando que mantiveron o compromiso de estar preto dos veciños e buscar solucións ás súas demandas.

APOIO AUTONÓMICO E NACIONAL

O PP de Vilagarcía tamén valorou positivamente o apoio recibido da Xunta e a Deputación, destacando investimentos clave como a construción do novo centro de saúde cun orzamento superior a 17 millóns de euros e actuacións nos centros educativos por máis de 800.000 euros.

Pola contra, os populares lamentan o “abandono” de Vilagarcía por parte do goberno central, criticando a falta de avances na mellora da N-640 e a rexeneración da praia de O Preguntoiro. Granja tamén recriminou a actitude de Varela, cualificándoo de “manso e servil” co executivo de Pedro Sánchez mentres mantén unha “guerra continua coa Xunta de Galicia”.