🔴 O BNG ESIXE A REFORMA DAS PRAZAS DE ESTACIONAMENTO PARA PERSOAS CON MOBILIDADE REDUCIDA EN VILAGARCÍA

O Bloque Nacionalista Galego (BNG) de Vilagarcía de Arousa vén de denunciar a falta de prazas de estacionamento adaptadas para persoas con mobilidade reducida no municipio, así como o incumprimento da normativa vixente en varias das existentes. A formación nacionalista solicita ao goberno municipal unha revisión integral de todas as prazas reservadas e que se leve a cabo a súa adecuación para garantir que cumpran coa lexislación en materia de accesibilidade.

Segundo sinalan dende o BNG, moitas destas prazas non contan coas dimensións axeitadas nin coa zona de transferencia lateral obrigatoria, o que dificulta ou incluso imposibilita o seu uso por parte das persoas que as precisan. Un caso especialmente rechamante é o das dúas prazas situadas no aparcadoiro da Estación de Autobuses de Vilagarcía, que teñen o mesmo ancho que as prazas convencionais e carecen da superficie adicional esixida por lei para facilitar o acceso.

Ante esta situación, o BNG insta ao goberno municipal a revisar e adaptar todas as prazas que non cumpran a normativa e, no caso das que non sexan de titularidade municipal, a realizar as xestións necesarias ante as administracións competentes para que se leven a cabo as melloras oportunas.

A accesibilidade universal é un dereito fundamental, e garantir un correcto deseño e disposición das prazas de estacionamento reservadas é clave para asegurar a igualdade de oportunidades e a autonomía das persoas con mobilidade reducida no espazo público.