🔴🛍 O GOBERNO DE VARELA APOSTA POR MANTER O MERCADO NA CONTORNA DA PRAZA 🛍🔴

📢 O Concello de Vilagarcía reafirma o seu compromiso de manter o mercado ambulante na contorna da Praza de Abastos, como xa trasladou en diferentes encontros cos ambulantes, praceiros, comerciantes e partidos políticos interesados nesta cuestión.

📌 O luns reunirase a Mesa Local do Comercio para abordar a reorganización do mercado, onde se exporá que a explanada posterior á Praza da Verdura é a localización prioritaria. Con todo, tamén se estudarán outras alternativas que poidan propoñer os sectores implicados.

🏛 Ademais, o goberno local propón abrir un debate sobre a infrautilización da Praza da Peixería, un edificio histórico do século XIX que foi construído como mercado e que podería xogar un papel na reorganización do comercio local.

🚗 MERCADO E MOBILIDADE: UN EQUILIBRIO NECESARIO

Un dos puntos clave para o Concello é garantir a convivencia entre o mercado e a mobilidade urbana, asegurando que a actividade comercial non condicione o funcionamento da cidade. Por iso, e tendo en conta a inminente humanización da rúa Conde de Vallellano, confírmase que o mercado non poderá continuar en Arcebispo Lago. Os postos que actualmente ocupan esa zona deberán ser reubicados na parte posterior da Verdura ou noutro lugar que se estime axeitado a través do diálogo na Mesa de Comercio.

🔎 DATOS CRAVES:

📌 O mercado non está en decadencia. Actualmente hai máis autorizacións concedidas que en 2013, cando o Partido Popular levou a cabo a súa regularización. De feito, na última sesión da Xunta de Goberno presentáronse tres novas solicitudes de instalación.

📌 Factores de cambio. A realidade do mercado ambulante está condicionada polos novos hábitos de consumo e o crecemento da superficie comercial en Vilagarcía, que a diferenza doutras localidades, conta cunha ampla oferta comercial que inflúe no comportamento da clientela. O goberno local considera que este é un aspecto clave sobre o que a Mesa de Comercio debería reflexionar en profundidade.

📌 Diálogo aberto e busca de consenso. O Concello está mantendo un contacto continuo cos distintos sectores implicados –ambulantes, praceiros, comerciantes e partidos políticos–, así como cos técnicos municipais de urbanismo, mobilidade, policía local, secretaría xeral, mercados e promoción económica. A cuestión é complexa e require unha negociación seria e comprometida para atopar unha solución estable e beneficiosa para todos.

📌 A clave: dinamización e implicación. O goberno local pode e debe poñer os medios para garantir o futuro do mercado, pero tamén considera que os primeiros interesados na súa dinamización deben ser os propios profesionais que traballan nel.

📣 A MESA DE COMERCIO, O FORO PARA A SOLUCIÓN

A intención do goberno local é que a Mesa de Comercio sexa o espazo estable para o debate e a toma de decisións sobre o futuro do mercado. Con reunións periódicas, buscarase unha solución definitiva que permita manter o mercado na contorna da praza, garantindo a súa viabilidade sen comprometer o funcionamento diario da cidade.

📌 Seguiremos informando! Comparte e comenta a túa opinión!

#MercadoVilagarcía #PrazaDeAbastos #ComercioLocal #Mobilidade #Vilagarcía