🔴 O PP ACUSA AO GOBERNO DE VARELA DE MENTIR SOBRE A EXECUCIÓN DOS FONDOS EDUSI

O Partido Popular de Vilagarcía afirma que un terceiro escrito oficial do Goberno de España confirma os seus datos sobre a execución dos fondos EDUSI e desmonta a versión do goberno socialista. Segundo os populares, o Concello só recibiu 2.739.896,83 euros de axuda europea, moi por debaixo dos 5 millóns de euros que, segundo eles, poderían beneficiar á cidade.

Desde o PP denuncian que o executivo de Alberto Varela intentou enganar á cidadanía ao inflar as cifras de execución. A portavoz popular, Ana Granja, lembra que a edil de Urbanismo, Paola María Mochales, asegurou en sesión plenaria que o Concello executara 4,1 millóns de euros, pero os documentos oficiais sinalan que a cantidade real foi de 3,4 millóns, dos cales 2,73 millóns proceden de fondos europeos.

💬 “O goberno local mentiu sen pudor en sede plenaria. Primeiro dixeron que se executaran máis de 4,1 millóns de euros. Despois, cando se viron acurralados, falaron dun 63,16 % de execución. Agora, con este terceiro documento oficial que confirma os datos do PP, xa non teñen escapatoria”, denuncia Granja.

Os populares lamentan que, en vez de recoñecer o erro e pedir desculpas, o goberno local optase por atacar ao PP. “O alcalde perdeu toda a súa credibilidade. Intentou retorcer os datos, acusou ao PP de manipulación e, agora que se demostrou que o seu goberno mentiu, mira para outro lado esperando que os veciños o esquezan”, critica Granja.

Desde o PP lembran que esta non é a primeira vez que o goberno de Varela trata de manipular datos para ocultar a súa mala xestión. “Desde o principio tentaron confundir á cidadanía, tergiversaron a información e lanzaron ataques contra o PP en lugar de asumir os seus erros. Pero ao final, a verdade sempre sae á luz”, destacan os populares.

O grupo municipal do PP avisa de que seguirá fiscalizando a xestión dos fondos europeos e denunciando calquera intento do goberno local de manipular a información. “Os vilagarciáns merecen un goberno que lles diga a verdade e non un executivo atrapado nas súas propias mentiras”, conclúe Ana Granja.