🔴 AS XESTIÓNS DE RAÚL SANTAMARÍA E JULIO VARELA AXUDAN A QUE O CEE DE VILAGARCÍA DISPOÑA DUNHA ENFERMEIRA A XORNADA COMPLETA

O Partido Popular de Vilagarcía celebra que a Xunta de Galicia dotase ao Centro de Educación Especial dunha enfermeira a tempo completo, respondendo así a unha demanda da comunidade educativa. A formación destaca o traballo realizado polo deputado autonómico Raúl Santamaría e polo representante no consello escolar do centro, Julio Varela, que desde novembro estiveron en contacto coa Consellería de Educación para atopar unha solución.

O PP lembra que xa en novembro a Consellería respondeu a outras necesidades do centro, asignando dous profesores de pedagoxía terapéutica e un coidador. En febreiro, iniciáronse os trámites para cubrir tamén a demanda dunha enfermeira a tempo completo, que agora se fai realidade.

Santamaría puxo en valor a forma de traballar do PP, baseada no diálogo entre administracións e coa comunidade educativa, e ofreceuse a seguir canalizando as demandas doutros centros de Vilagarcía. Pola súa parte, a portavoz do PP local, Ana Granja, celebrou a noticia e reiterou o compromiso do seu partido cos centros educativos da cidade.

Os populares tamén destacaron os investimentos da Xunta na educación en Vilagarcía, como a ampliación do CIFP Fontecarmoa cun orzamento de 3 millóns de euros, os 640.000 euros destinados á ampliación do CEIP Arealonga ou os 169.000 euros para a instalación dun ascensor no IES de O Carril.

Finalmente, lamentaron a actitude do goberno local, encabezado por Alberto Varela, ao que acusan de enfrontarse coa Xunta en vez de colaborar para buscar solucións ás demandas dos veciños.