🔴 CATOIRA RESCATA A REHABILITACIÓN DAS TORRES DO OESTE GRAZAS A UN NOVO PROXECTO E MÁIS ORZAMENTO

O Concello de Catoira conseguiu desbloquear a rehabilitación do Espazo das Torres do Oeste tras a presentación de dúas ofertas por parte de empresas interesadas. Así o anunciou o alcalde, Xoán Castaño, quen celebrou que as obras de acondicionamento “saian por fin adiante” logo de meses de incerteza.

O proxecto fora inicialmente redactado durante o anterior mandato, pero quedara deserto ao saír a concurso debido ao seu carácter inconexo e a un orzamento insuficiente, fixado en 299.000 euros. Ante o risco de perder a subvención da Xunta de Galicia, o novo goberno local decidiu reformular completamente a proposta, mellorándoa tanto técnica como economicamente. O novo plan supón un incremento do 40% no investimento, elevando o orzamento ata os 420.450 euros.

Este novo proxecto forma parte do “Proxecto sostible de mantemento e rehabilitación do patrimonio histórico de uso turístico dos Camiños de Santiago no conxunto monumental Torres de Oeste”, e inclúe actuacións clave como a rehabilitación da capela (con obras no tellado, restauración da imaxe do Apóstolo, portas novas e cable do badalo da campá), así como a instalación dun panel divulgativo.

Tamén está prevista a mellora do acceso ao recinto: retirarase a caseta actual e instalarase unha nova complementaria á do CACTO. Ademais, eliminaranse as columnas que impiden o acceso a vehículos de emerxencias, renovarase parte do itinerario costeiro con táboas novas e instalarase iluminación encastrada no chan.

Un dos aspectos máis innovadores será a instalación dunha recreación virtual da defensa das Torres de Oeste fronte ás incursións viquingas, co obxectivo de potenciar o atractivo turístico da zona. O plan inclúe tamén o acondicionamento vexetal, a reparación do escenario, a renovación do mobiliario urbano e a colocación de bolardos retráctiles para controlar o tráfico.

A adxudicación podería formalizarse antes do verán, e, cun prazo de execución de seis meses, as obras poderían estar rematadas a comezos de 2026. Queda pendente a coordinación dos traballos para minimizar as molestias nun espazo especialmente transitado durante os meses estivais.

O rexedor amosouse esperanzado: “Habendo dúas empresas, agardamos que as ofertas sexan viables, que a adxudicación se faga sen contratempos, e que o Espazo das Torres poida ter finalmente a mellora que merece”.