🔴 EU URXE Á XUNTA A ACLARAR OS DETALLES DO PIA DE VIVENDAS PROXECTADO EN A LAXE

 

Esquerda Unida vén de solicitar unha xuntanza urxente co Instituto Galego da Vivenda e Solo (IGVS) para coñecer con detalle o proxecto do Plan de Investimentos Autonómico (PIA) que prevé a construción de vivendas públicas na zona de A Laxe.

O voceiro de EU en Vilagarcía, Juan Fajardo, subliña que “sendo absolutamente certa a necesidade de vivenda pública na cidade, a administración debe ser sensible á inquedanza que este proxecto está a xerar entre os propietarios da zona afectada”. Fajardo considera inxustificable que os veciños e veciñas descoñezan por completo os detalles do plan, tales como as posibles expropiacións, a localización dos viais, o tipo de construcións ou o impacto en servizos e tráfico.

A formación denuncia a falta de transparencia arredor do proxecto e reclama información clara e detallada sobre como lles afectará ás persoas residentes, tanto ás que poderían ser expropiadas como ás colindantes.

“Compartimos a necesidade urxente de crear vivenda pública e asequible en Vilagarcía, pero non a costa de vulnerar o dereito da veciñanza a ser informada e participar”, sinalan desde EU. Ademais, reiteran o seu apoio á creación de vivendas accesibles ante a grave situación do mercado inmobiliario na cidade, con escasa oferta e prezos abusivos.

Por todo isto, Esquerda Unida insta á Xunta a cumprir coa súa obriga de dialogar coa veciñanza, facilitar datos relevantes do proxecto e abrir canles efectivos de participación. Unha vez celebrada unha primeira reunión cos afectados, EU solicita agora un encontro co IGVS no que se dean a coñecer todos os detalles do PIA e os seus efectos.