🔴 O PAVILLÓN DE FONTECARMOA PASARÁ A CHAMARSE ‘SARA GÓMEZ’ EN HOMENAXE Á XOGADORA VILAGARCIÁ

Vilagarcía renderá este sábado unha emotiva homenaxe á xogadora de baloncesto Sara Gómez, dando o seu nome ao pavillón de Fontecarmoa. A iniciativa busca recoñecer a traxectoria dunha das figuras máis destacadas do deporte local, tanto polo seu paso polo AD Cortegada como pola súa participación nas seleccións nacionais da Federación Española de Baloncesto.

O acto celebrarase o sábado ás 18:45 horas, coincidindo co último encontro da tempada do AD Cortegada, e incluirá o descubrimento dunha placa coa imaxe da deportista no hall do edificio. Ademais, o nome de Sara Gómez tamén figurará no exterior do pavillón, acompañado da nova identidade corporativa do Concello de Vilagarcía, que se estrea ese mesmo día.

O goberno local subliña que este recoñecemento responde ao compromiso co deporte como ferramenta de saúde, benestar e promoción de valores como o esforzo e a superación. O alcalde Alberto Varela destacou que Gómez “non só foi unha figura emblemática a nivel local, senón que tamén levou o nome da vila por todo o mundo”.

A xogadora conta cunha brillante carreira, na que representou a España en catro campionatos internacionais entre 2004 e 2007, e formou parte do AD Cortegada en dúas etapas, destacando a tempada 2008-2009, cando disputou a Eurocup feminina.

Durante o acto tamén se proxectará un vídeo homenaxe e faráselle entrega dun obsequio. Está prevista a asistencia de representantes do goberno municipal, da Federación Galega de Baloncesto e da Deputación de Pontevedra.

O cambio de nome do pavillón será oficializado administrativamente no pleno ordinario do Concello.