O barrio do Piñeiriño vivirá este domingo, 14 de abril, unha xornada festiva e solidaria coa celebración da segunda edición do festival ‘Solifest’, unha iniciativa organizada pola Asociación Veciñal Breogán e Amencer Aspace, coa colaboración do Concello de Vilagarcía. A partir das 12:00 horas, música, gastronomía e actividades infantís converterán esta zona da cidade nun punto de encontro para a veciñanza e para todas aquelas persoas que queiran apoiar unha causa solidaria.
O festival naceu o ano pasado cun gran éxito de participación e implicación veciñal. “A resposta do ano pasado foi incrible, e este ano pinta aínda mellor. Hai un nivel de implicación emocionante, con todos os veciños ofrecéndose para colaborar montando, vendendo produtos… todo co obxectivo de sumar”, explica Pedro Falcón, membro da organización.
O alcalde de Vilagarcía, Alberto Varela, destacou o papel dinamizador da entidade organizadora: “Sen lugar a dúbidas podo dicir que o Piñeiriño e a súa asociación veciñal é unha das máis activas, máis participativas e máis dinámicas de toda Vilagarcía”. Pola súa banda, o deputado provincial Javier Tourís puxo en valor o traballo de Amencer Aspace “tanto cos usuarios como coas familias”.
No acto tamén participaron a concelleira de Cultura, Sonia Outón, a portavoz do PP, Ana Granja, e o portavoz do BNG, Xabier Rodríguez, xunto con Rosa Abuin, da formación nacionalista.
O recadado durante o festival irá destinado integramente a Amencer Aspace. O ano pasado, grazas á colaboración da cidadanía, o centro puido mercar un sistema de comunicación alternativo baseado en tecnoloxía ocular. Este ano, como indicou o director do centro, David Carrera, o obxectivo é investir en fisioterapia, cunha cinta camiñadora e outros aparellos necesarios. Se se repite a onda de solidariedade, tamén se axudará directamente a familias usuarias do centro.
Un programa para todos os públicos
O evento arrincará ás 12:00 horas co set do Mozo de Arousa, Borjamina, e contará cun cartel musical de luxo que inclúe a actuación internacional de Kevin Weatherill, líder do mítico grupo británico Immaculate Fools. Tamén participarán Froallo, DJ Al, Isi Vaamonde, La Yaya DJ, Dani Barreiro, Kris K DJ, Somoza Trío e Fran García, caracterizado como Freddie Mercury.
A parte gastronómica terá tamén gran protagonismo. A Zona Gastro, coordinada por Rubén García e Xoanqui Ameixeiras, ofrecerá tapas gratuítas e vermús. Os máis pequenos poderán desfrutar da proposta ‘Festivaliño On The Roads’, pensada especificamente para eles. Como novidade desta edición, o Salón Gentleman estará na rúa realizando cortes de peiteado en directo.
Para colaborar coa causa, os asistentes poderán facer doazóns nas huchas móbiles ou adquirir produtos de merchandising na carpa que Aspace terá no recinto.
Desde a organización xa se confirmou que Solifest volverá en 2026 cunha terceira edición.
