A Asociación Española de Cidades do Viño (Acevin) celebrou onte a súa XXXII asemblea na localidade aragonesa de Cariñena, cunha ampla representación das vilas vitivinícolas máis destacadas do Estado. Entre elas, Cambados volveu ter un papel protagonista coa presenza do concelleiro de Enoturismo, José Ramón Abal, que forma parte da xunta directiva da entidade como vicepresidente.
Unha década despois de que Cambados pasara a formar parte de Acevin, o edil cambadés aproveitou esta cita para reivindicar o “traballo continuado” que a vila vén desenvolvendo desde o ano 2015 para consolidarse como destino enoturístico de referencia, tanto a nivel nacional como internacional. Abal destacou a intensa actividade promovida desde o Concello e o Consello Regulador, con iniciativas como a Festa do Albariño en Vitoria ou o Campionato de España de Cata a cegas por equipos, que amplían a pegada do Albariño e de Cambados fóra de Galicia.
Na asemblea tamén se anunciou a incorporación da Ribeira Sacra ao club de produto Rutas del Vino de España, un distintivo promovido por Acevin e Turespaña que suma prestixio ao enoturismo galego. Neste sentido, Abal subliñou que a presenza activa de Cambados na dirección de Acevin contribúe a “fortalecer a posición do enoturismo galego, promovendo o seu patrimonio cultural, económico e vitivinícola dentro e fóra das fronteiras autonómicas”. Para o concelleiro, esta incorporación é “unha excelente nova que avala o traballo conxunto feito desde hai unha década e demostra que Cambados é un referente real no mapa enoturístico español”.
