O alcalde de Cambados, Samuel Lago, dirixiuse por escrito ao presidente da Xunta de Galicia, Alfonso Rueda, para solicitar a construción dunha nova residencia pública de maiores no municipio, unha demanda que cobra especial relevancia tras o peche do Asilo de Montesacro, a única infraestrutura deste tipo que existía na vila.
Na súa carta, remitida o pasado 2 de maio, o rexedor lembra que Cambados forma parte dunha comarca cunha alta densidade de poboación como é O Salnés, e cun notable proceso de envellecemento demográfico, polo que considera “evidente e urxente” a necesidade de dotar ao municipio dunha nova residencia asistencial para persoas maiores.
Samuel Lago sinala que a recente decisión da Xunta de promover novas residencias en distintos puntos de Galicia, anunciada polo propio presidente no Parlamento, “é unha medida moi positiva”, pero reclama que Cambados sexa incluído entre os concellos beneficiarios, debido á importante demanda social existente.
Ademais, o alcalde ofrece a colaboración total do Concello de Cambados para facilitar a implantación do proxecto, tanto na identificación de terreos como na xestión urbanística e administrativa necesaria. Incluso propón unha alternativa concreta: que a Xunta adquira o Pazo de Montesacro, co obxectivo de recuperar o seu uso como residencia de anciáns.
“A perda deste servizo deixou sen alternativa a moitas familias cambadesas e do conxunto da comarca. É necesario dar unha resposta urxente e firme, que permita garantir unha atención digna aos nosos maiores”, conclúe Lago, quen se mostra tamén disposto a manter reunións co goberno galego para avanzar nesta proposta.
